Tuesday , March 19 2024
PROMDI ni Fernan AngelesI
PROMDI ni Fernan Angeles

Dorobong haciendero

PROMDI
ni Fernan Angeles

HABANG abala ang marami sa paghahanda para sa nalalapit na halalan, sinasamantala naman ng isang sindikato ang pagbabakod ng mga lupain sa bulubunduking bahagi ng Binangonan, sa lalawigan ng Rizal.

Katuwiran ng sindikatong pinamumunuan umano ng mag-asawang nakabase sa Cardona, Rizal, sa kanila ang buong Binangonan – at maging ang malaking bahagi ng mga karatig-bayan. Pati ang lupang kinatitirikan ng mga munisipyo, himpilan ng pulisya, piitan, bahay-sambahan, husgado, pagamutang bayan at maging ang mga pampublikong paaralan, sa kanila daw lahat ‘yan!

Kilalang nakaririwasa ang pamilyang Guido. Taong 1991 nang maglabas ng desisyon ang Korte Supreme sa 7,000 ektaryang higit na kilala bilang Hacienda de Angono na bumabagtas sa mga bayan ng Cardona, Binangonan, Angono at Taytay. Ayon sa Korte Suprema sa mga Guido ang Hacienda de Angono, kalakip ang mga kondisyong tanging yaong wala pang titulo ang kanilang mababawi.

Bagamat kinatigan ang kanilang pinanghahawakang sinaunang titulo, hindi naman ito nangangahulugang sila na rin ang may-ari ng buong bayan ng Binangonan na may sukat na 7,270 ektarya, Angono na may sukat na 2,300 ektarya, Taytay na 3,880 ektarya, at Cardona na mayroon namang 3,115 ektarya.

Ang siste, marami na umano silang naibentang lupa sa mga pribadong kompanya at maging sa mga dukhang minsang nangarap magkaroon ng sariling tahanan, bagay na kanilang itinanggi matapos nilang makuha ang kabayaran.

Hindi lamang isa ang dumaing sa ginagawang pagbabakod ng sindikato. Ayon sa ating impormante, estilong magnanakaw ang pagbabakod – sa kalaliman ng dilim at bago pa pumutok ang araw, tambad na ang mga armadong guwardiyang handang pumatay sa sinumang sa kanila ay sisita.

Ang masaklap, pati ang mga tituladong lupa kanilang pinupuntirya, binabakuran at bantay sarado ng mga armadong guwardyang mula lang kung saang lupalop – bagay na idinulog sa pulisya na agad namang nagresponde bilang tugon sa kanilang mandato.

Ang problema, nabahag ang buntot ng mga pulis at iniwan ang mga kawani ng munisipyo matapos makita ang hindi bababa sa 40 armadong guwardiyang kinontrata ng sindikato.

Susmaryosep!

Nang makarating sa kinauukulan ang insidente, agad naglabas ng direktiba ang punong himpilan ng Philippine National Police (PNP) – sibak sa puwesto pati ang hepe.

‘Yan ba ang kalidad ng mga pulis na karaniwang takbuhan ng mga naagrabyado? Hindi ba’t bahagi ng kanilang mandato ang protektahan ang mga mamamayan at pairalin ang batas nang walang kinikilingan at pinangingilagan?

Hahayaan na lang ba ng PNP na maghari-harian ang dorobong haciendero? Kung hindi kaya ng PNP, puwede naman sigurong pasukan na rin ng National Bureau of Investigation (NBI) para tuluyan nang tuldukan ang pang-aagrabyado sa hanay ng mga negosyante at mga pobreng mamamayang ang tanging kasalanan ay mangarap na bigyan ang pamilya ng sariling tahanan.

About Fernan Angeles

Check Also

FIRING LINE ni Robert B. Roque, Jr.

Quiboloy, wanted dito at sa ibang bansa

FIRING LINEni Robert B. Roque, Jr. PARA sa isang sumusumpang inosente siya habang nagkukubli sa …

Dragon Lady Amor Virata

Negosyanteng intsik  inirereklamo ng mga empleyado

Isumbong mokay DRAGON LADYni Amor Virata INIREREKLAMO ng may 11 empleyado ang JUJU Mart na …

FIRING LINE ni Robert B. Roque, Jr.

Namamayagpag si Tulfo

FIRING LINEni Robert B. Roque, Jr. SA HULING survey ng WR Numero na ginawa noong …

Dragon Lady Amor Virata

Surot, surot at surot pa…

Isumbong mokay DRAGON LADYni Amor Virata MAPUPULANG pantal at ubod nang kating naranasan ng ilang …

Sipat Mat Vicencio

Sobrang epal ni Bong Revilla

SIPATni Mat Vicencio DAHIL na rin sa mga kapalpakang ginagawa ni Senator Ramon “Bong” Revilla, …