Celebrity photographer Raymund Isaac pumanaw na

HATAWAN
ni Ed de Leon

PINAG-UUSAPAN nila ngayon ang pagpanaw ng photographer na si Raymund Isaac dahil sa komplikasyon ng Covid19. Isang kilalang photographer si Raymund at lahat halos ng mga artista natin na nagkaroon ng malaking projects tiyak na sa kanya nag-pictorial. Isa sa pinaka-close sa kanya at laging sa kanya nagpapakuha ng picture ay si Ate Vi (Vilma Santos).

Umalis siya sa Pilipinas at nagpunta sa US kasama ang kabigan niyang si Jayson Vicente na pinakasalan niya sa California noong July 15. Doon kasi ay kinikilala ang same sex marriage. Matapos lamang ang ilang araw, si Raymund din ang nagsabi na tinamaan siya ng Covid, iyon ay sa kabila ng kanyang pagpapabakuna sa US pa ha. Marahil nagkaroon siya ng depression dahil hindi niya nagawa ang gusto niyang gawin sa US dahil sa sakit, na naging dahilan ng patuloy niyang paglala, hanggang noong Biyernes nga, September 3, sinasabing binawian na siya ng buhay. Matagal din siyang intubated, at under sedation. Mahirap ang kanyang naging sitwasyon, pero ngayon nga natapos na ang lahat ng hirap.