HATAW! D'yaryo ng Bayan hatawtabloid.com
IMINUNGKAHI ni Senate committee on basic education Chair Sherwin Gatchalian na ibuhos sa digital e-learning para sa mga guro ang pondo na nakalaan para sa kanila sa ilalim ng Bayanihan to Recover as One Act (Bayanihan 2).
Mas kailangan aniya ng mga guro na bumili ng kanilang gadgets, load, at data plan para maturuan ang kanilang mga estudyante.
Sa ilalim ng Bayanihan 2, P4 bilyon ang nakalaan para sa digital education, information, technology, digital infrastructure, at learning modalities.
Ngunit sa kasalukuyan ay iniisip umano ng Department of Education (DepEd) kung saan gagamitin ang pondo.
Isinusulong ni Gatchalian at iba pang senador ang panukala na magdadagdag ng allowances at mga supplies na kailangan ng mga guro ngunit hinihintay na maisapinal ng kapulungan kung magkano ang idaragdag sa P3,500 na kasalukuyang natatanggap ng mga guro taon-taon.
Ayon sa DepEd, ang bawat guro ay makatatanggap din ng iba’t ibang benefits tulad ng P500 para sa annual medical examination, P500 hazard pay, P500 kada araw sa pagtatrabaho sa mga lugar na nasa ilalim ng enhanced community quarantine (ECQ) at modified enhanced community quarantine (MECQ) maging ang P1,000 incentives tuwing World Teacher’s Day. (CYNTHIA MARTIN)
