HATAW! D'yaryo ng Bayan hatawtabloid.com
ANG buong paniniwala namin, sa mah-jong lang talaga nangyayari iyong tinatawag nilang “todo ambisyon.”
Aba ngayon maski sa showbiz pala may ganyan na rin.
Hindi lang pala iyong AlDub ang sinasabing tinalo na niyong MayWard at DonKiss. Isipin ninyong sa listahan na sila ang nangunguna, number 3 ang Aldub, number 4 lang ang LizQuen, at ang pinakamatindi number 5 lang daw ang KathNiel. Ha? Sinong lasing ang nagsabi niyan?
Ang batayan lang nila ay sila raw ang may pinakamaraming post sa isang social media platform. Ibig bang sabihin niyon ay sikat na sila? Sige nga pagawin ninyo ng pelikula ang mga iyan kung may maaani kahit na kamote o kalabasa man lang?
Iyong KathNiel ang nakapagrehistro ng box office record of all time. Walong daang milyong piso ang kinita ng kanilang pelikula noong nakaraang taon. Kahit na sinong superstar, hindi umabot sa P800-M. Tapos sasabihin ninyo number 5 dahil sa rami ng post ng trolls?
Iyong LizQuen, kahit na paano, iyong huling pelikula nila umabot naman sa kalahati ng gross ng pelikula ng KathNiel. Sige nga pagawin ninyo ng pelikula iyang dalawang love team na iyan, maski na pagsamahin silang apat. Tingnan natin kung maipalalabas sa mga sinehan.
Kung sa bagay uso naman iyon. Hindi ba may superstars ngang tinatawag na ang pelikula first day lang napu-pull out na sa sinehan. Mayroon pa ngang ni hindi naipalabas sa sinehan. Mayroon pa nga kung anong star ang tawag, ang kabuuang kita one day gross lamang ng KathNiel.
Sa kita ng pelikula makikita kung sino ang sikat. Iyang TV hindi rin naman magandang basehan eh, alam naman natin minsan o kadalasan manipulated din ang mga survey. Iyong pelikula talaga, na pera-pera ang usapan, iyan ang basehan. Kahit na mag-padding pa sila mahahalata sa sinehan kung kumikita o hindi.z
HATAWAN!
ni Ed de Leon
