Karaniwang show ng JaDine, pinapasok kahit mahal ang ticket

PINAG-UUSAPAN nga namin sa isang umpukan noong isang gabi, matindi ang inaabot talaga niyang JaDine. Hindi lamang dahil kumita ang kanilang pelikula, pero iyong mga concert na ginawa nila lalo na sa abroad ay napakalakas talaga. Napupuno nila ng tao ang malalaking venue, kahit na mahal ang tickets.

May nagsabi nga sa amin, mas mahal pa raw ang tickets sa concert niyong JaDine kaysa concert ng isang sikat na female star na Pinoy, ganoong iyong sa female star ay concert talaga, samantalang iyong sa JaDine, parang karaniwang show lamang.

Hanggang ngayon din, malakas ang benta ng kanilang libro at iyon ay nabibili sa isang respetadong bookstore chain, hindi kagaya ng iba na nakasabit kahit na sa mga used book shops.

Ang matindi pa, ngayon napapansin na rin sila kahit na sa mga international magazines. Hindi pa nangyari iyan noong araw. Marami na rin namang sumikat na Pinoy, pero hindi nga napansin sa abroad. Ngayon, ilo-launch pa sila sa Everyday Wear collection ng Bench. Matindi na iyan.

HATAWAN – Ed de Leon