12-anyos niluray ng titser

NAGA CITY – Pinaghahanap ang isang guro makaraan ang panghahalay sa kanyang estudyante sa Guinayangan, Quezon.

Kinilala ang suspek sa pangalang “Alex,” kasalukuyang nagtuturo sa isang pampublikong paaralan sa nasabing bayan.

Nabatid na nag-iisa ang 12-anyos biktima sa loob ng kanilang silid-aralan nang biglang lumapit ang nasabing guro at sinimulang hawakan ang pribadong bahagi ng katawan ng dalagita.

Makaraan ang nasabing insidente, agad nagsumbong ang biktima sa kanyang magulang na humingi rin ng tulong sa mga awtoridad.

Sa inisyal na imbestigasyon, hindi lang isang beses pinagsamantalahan ng titser ang biktima.

Ayon sa biktima, ilang ulit na siyang hinalay ng kanyang guro na nagsimula pa noong buwan ng Hulyo nang nakaraang taon.

Tinakot aniya siya ng guro na papatayin kung magsusumbong sa mga magulang.

Sa ngayon, pinag-ibayo ang paghahanap ng mga awtoridad sa nasabing suspek habang inihahanda na ang kasong isasampa sa kanya.