Dividendazo ipinagdamot lolo, tinaga

SUGATAN ang isang 60-anyos lolo makaraan pagtatagain ng isang ‘karera afficionado’ nang ipagdamot ng biktima ang dividendazo o programa sa karera kamakalawa ng gabi sa Tondo, Maynila.

Nakaratay sa Metropolitan Medical Center ang biktimang si Augusto Buan, front desk manager, ng 1741 Antonio Rivera St., Tondo, Maynila, tinamaan ng taga sa noo at kanang kamay, makaraan tagain ng suspek na si Ramsey Luigi, 40, ng Bambang St.,Tondo, Maynila.

Sa imbestigasyon ni PO3 Reynaldo Ferrer, ng Manila Police District Station 2, naganap ang insidente dakong 10:05 p.m. sa panulukan ng Abad Santos at Quiricada streets, Tondo, Maynila.

Ayon sa saksing si Reggie Barrera, 37, driver, ng 1692-E Antonio Rivera St., Tondo, Maynila, kinuha ng suspek nang walang paalam ang dividendazo ng biktima na ikinagalit ng matanda.

Bunsod nito, nagtalo ang dalawa hanggang umuwi ang suspek ngunit pagbalik ay may dalang itak at pinagtataga ang biktima.

Kasalukuyang pinaghahanap ng mga awtoridad ang suspek.

Leonard Basilio, may kasamang ulat nina Angelica Ballesteros, Rhea Fe Pasumbal, Beatriz Perena at Anne Marielle Eugenio