P13-M gastos sa piitan ng ‘Bilibid 19’ sa Muntinlupa

PINASINAYAAN kahapon ang lilipatang Building 14 ng high-risk inmates ng New Bilibid Prison (NBP).

Ililipat sa naturang gusali sa maximum security compound ng Bilibid ang tinaguriang “Bilibid 19” na pansamantalang inilipat sa National Bureau of Investigation (NBI) makaraan mapag-alamang nagpapasok sila ng kontrabando sa Bilibid.

Ayon kay Bureau of Corrections (BuCor) spokesperson at chaplain Roberto Olaguer, may 29 kulungan ang gusali na kasya ang 58 bilanggo.

Bawat selda nito ay may nakatutok na closed-circuit television (CCTV), double deck na kama, lababo at kubeta.

Sabi ni BuCor Director Rainer Cruz III, dati itong execution chamber building na 84 bilanggo ang isinalang sa silya elektrika.

Huli itong ginawa noong Oktubre 21, 1976.

Umabot sa P13 milyon ang ginastos sa rehabilitasyon ng lugar.

Ayon kay Justice Sec. Leila De Lima, wala pang petsa kung kailan ililipat ang “Bilibid 19” na ngayo’y 18 na lang makaraan mamatay ang isa dahil sa iniindang sakit.