Personal background ng mag-asawang nalason binubusisi

TITINGNAN din ng pulisya ang personal background ng mag-asawang manager na namatay dahil sa pagkalason sa Las Piñas City.

Ayon sa Las Piñas City Police, lahat ng anggulo ay kanilang binubusisi hinggil sa pagkamatay ng mag-asawang sina Juliet at Jose Maria Escano.

Sa kuha ng CCTV surveillance camera sa paligid ng mall, lumalabas na tatlong oras namalagi sa loob ng kanilang Toyota Innova (TLQ-346) ang mag-asawang Escano.

Pumarada sila sa open parking dakong 3 p.m. nitong Huwebes (Hulyo 9) at dakong 7:30 p.m. ay natagpuang walang malay.

Nauna nang hiniling ng mga kaanak ng mag-asawang Escano na i-autopsy ng National Bureau of Investigation (NBI) ang bangkay ng mga biktima para sa ikakalilinaw ng kaso.

Jaja Garcia