Pamilya minasaker sa North Cotabato

KORONADAL CITY – Masusing iniimbestigahan ng mga awtoridad ang pagmasaker sa isang pamilya sa bayan ng Kabacan, North Cotabato kamakalawa.

Kinilala ni Senior Inspector Ronnie Cordero, OIC ng Kabacan PNP, ang mga biktimang si Roger Gracia, 47, magsasaka, misis niyang si Milcha Ricanor, 49, at anak nilang si Danny Anne,14, pawang mga residente ng Purok Pag-asa, Brgy. Aringay sa nabanggit na bayan.

Ayon kay Senior Insp. Cordero, pinasok ng hindi nakilalang mga armado ang bahay ng pamilya Gracia at pinaputukan sila gamit ang kalibre .45 baril.

Narinig na lamang ng mga kapitbahay nila ang mga putok kaya’t ipinagbigay-alam ito sa barangay kapitan at mga awtoridad.

Nang magresponde ang mga pulis, nakita na lamang na nakabulagta na sa sahig ang mga biktima at wala nang buhay.

Malaki ang paniniwala ng mga awtoridad na kilala ng mga biktima ang mga suspek kaya pati ang dalagita ay idinamay sa krimen.

Inaalam pa ng pulisya kung ano ang motibo sa krimen.