Textmate na dalagita tinurbo ng 2 obrero

DAGUPAN CITY – Arestado ang dalawang construction worker na gumahasa sa kanilang textmate na dalagita sa bayan ng Pozorrubio sa lalawigan ng Pangasinan kamakalawa.

Napag-alaman, binabantayan ng biktimang itinago sa pangalang Nene, ang maysakit niyang ina nang i-text siya ng suspek na si Jericho Garcia, 18, residente sa lalawigan ng Nueva Ecija at niyayang maglakad-lakad.

Agad sumakay sa motorsiklo ang dalagita nang sunduin siya ng suspek ngunit hindi niya inasahang dadalhin siya sa construction site kung saan nagtatrabaho si Garcia.

Dito isinagawa ng suspek ang panggagahasa sa biktima kasama ang kanyang katrabahong si Randy Vergara, 25.

Makaraan ang panghahalay, isinakay ni Garcia ang biktima sa motorsiklo at iniwan sa kalsada sa Brgy. Bobonan sa nasabing bayan.

Masuwerteng nakasalubong ng biktima ang isang Frennel Damason na sinamahan siyang i-report sa Sison Police Station ang kanyang sinapit.

Sa pakikipagtulungan ng Sison PNP at Pozorrubio PNP, agad  nadakip ang dalawang suspek na nahaharap sa kaso.