Bakit binebeybi ng taga-Malakanyang ang MILF?

WALANG ipinagkaiba ang estilo ng gobyerno at ng Moro Islamic Liberation Front (MILF) sa ginagawa ngayon ng Islamic State of Iraq and the Levant (ISIL) na mas kilala ngayon bilang ISIS—puro terorismo. Nagsuko lamang ng 75 lumang armas at dinekomisyon bilang mga kawal ang 145 nakatatandang miyembro, may banta na ang MILF na hindi na sila papayag sa ikalawang yugto ng arms at forces decommissioning kung hindi papasa sa Kongreso ang Bangsamoro Basic Law (BBL).

Sabi nga ng mga tunay na nakaiintindi sa sitwasyon sa Mindanao: “E ano ngayon?” Kakatwa ang ikinikilos mismong ni Pangulong Aquino lalo’t umiikot ngayon ang tsismis na milyon-milyong dolyar na pumasok sa sikretong account sa Malaysia ng isang miyembro ng kanyang Gabinete. Iba pa ito sa sinasabing suhol sa mga mambabatas at sa kaban ng Liberal Party ng Chinese fugitive na si Wang Bo na natsitsismis namang kasabwat ng kilalang gambling lord ng Pilipinas na si Charlie “Atong” Ang sa online gambling sa Cagayan Special Economic Zone Authority (CEZA).

Sa masyado tuloy “pagbeybi” ni PNoy sa MILF, may mga makabayang grupo na gustong magtatag ng rebolusyonaryong kilusan tulad ng Tagalog Republic Freedom Fighters, Mindanao Lumad Guerillas for Independence, Solid North Republican Army at kung ano-ano pa.

Wala kasi sa hulog na parang nananakot ang mga taga-Malakanyang na magkakagulo kapag hindi ipinasa ng Kongreso ang BBL. Ano ‘yan, sapilitan? Maghunos-dili naman sana si Pnoy at ang kanyang mga alipores kung bakit ipinipilit sa ating bansa ang BBL na halatain namang “obra maestra” ng Malaysia para balewalain ng Filipinas ang ating paghahabol sa Sabah.

Mabuti pa si dating Department of Interior and Local Government secretary Rafael Alunan III, maskuladong-maskulado ang paninindigan laban sa BBL. Sabi nga ni Alunan sa kanyang facebook account:  “Ang decommissioning ay dapat hindi tinitingi at dinidiktahan ng MILF. Anak ng papay naman kayo sa gobyerno.

“Ang balita ko naisahan na naman ang gobyerno sa turnover – 75 na nga lang ang isusuko pero kinulang pa; karamihan mga Garand; at  ang mga taong dinecommission ay matatanda na. Parang ‘yung haosiao na balik-baril program sa aming panahon na inihinto namin dahil sa recycling ng surrenderees at firearms na ginawang negosyo.

“Ang laki ng pera na ibibigay – nasa P950 million para sa sarsuwela samantala hanggang ngayon, hindi pa natatanggap ng ating mga beteranong sundalo at pulis ang kanilang delayed na pension na nagkakahalaga ng P18-B sa kasalukuyan.

“Ibasura ang CAB-BBL dahil hindi makabubuti ito sa kalagayan ng ating bayan. Dahil sa mishandling ng peace process sa umpisa pa lang; ang maling pagkapili ng Malisya (Malaysia) bilang peace broker; at malawakang pagkukulang ng government negotiating panel, hindi natin makakamtan ang mapayapang kinabukasan na ibinibenta ng pamahalaan sa sambayanang Pilipino. “Magkakagulo sa ating bayan maaprubahan man ang BBL o hindi. Kaya’t pinaghahandaan ng mga taga-Mindanao ang kanilang seguridad at ligtas kung saka-sakali sisiklab doon sa kanilang mga lugar. Dapat ganoon din dito sa Metro Manila dahil malaki ang tsansa na dadalhin ng mga jihadista ang kanilang terorismo sa ating mga lungsod.”