Mekaniko utas sa tingga, suspek tiklo sa ospital

PATAY ang isang 57-anyos mekaniko makaraan pagbabarilin ng isang lalaking biktima ng pananaksak kamakalawa ng gabi sa Caloocan City.

Agad binawian ng buhay ang biktimang si Antonio Quinto, tubong Torrios, Marinduque, residente ng Block 29, Lot 10, Phase 2, Recomville 2, Bagumbong, Brgy. 171 ng nasabing lungsod.

Habang agad naaresto ang suspek na kinilalang si Joel Austria, nasa hustong gulang, kalugar ng biktima, nilalapatan ng lunas sa

Novaliches District Hospital dahil sa mga saksak sa kanyang katawan.

Batay sa ulat ni PO3 Gomer Mappala, dakong 8:20 p.m.  nang maganap ang insidente sa Diamond St. ng nasabing barangay.

Salaysay ng saksing si Mary Joy Pasacay, naglalakad siya sa nasabing lugar nang makita ang tumatakbong biktima habang hinahabol at pinagbababaril ng suspek na si Austria.

Nauna rito, lumabas ng bahay ang suspek ngunit makaraan ang ilang minuto ay bumalik na may mga tama ng saksak sa katawan na mula sa isang alyas Ambet na una ni-yang nakaaway.

Nang muling lumabas si Austria na armado ng kalibre .45 ay pinagbabaril si Quinto na agad binawian ng buhay.

Pagkaraan ay nagpahatid ang suspek sa nasabing pagamutan kung saan siya naaresto ng mga awtoridad.

Rommel Sales