Yosi ipinagdamot welder todas sa untog at saksak

PATAY ang isang welder makaraan iuntog ang ulo at pagsasaksakin ng nakaaway na obrero nang hindi mamigay ng yosi sa Valenzuela City kamakalawa ng gabi.

Agad binawian ng buhay ang biktimang si Gerold Camus, alyas Jerry Boy, 45, residente ng Saint Matthew St., Brgy. Gen. T. De Leon ng nasabing lungsod.

Habang kusang- loob na sumuko sa mga awtoridad ang suspek na si Jinnes Garin, 23, tubong Biliran, Leyte, at residente ng Compound 2, Sitio Kabatuhan ng nasabing barangay, nahaharap sa kasong murder, nakapiit na sa detention cell ng Valenzuela City Police.

Batay sa ulat ni PO3 Edwin Mapula, dakong 9:30 p.m. nang maganap ang insidente malapit sa bahay ng biktima.

Salaysay ni Tristan Barcial, kasamahan ng biktima, inutusan siya ni Camus na bumili ng sigarilyo sa kalapit na tindahan at nang bumalik siya upang ibigay ito ay humihingi si Garin.

Sa puntong ito, sinabihan ng biktima ang suspek ng katagang, “Matutong bumili ng sigarilyo kung gustong magbisyo,” na ikinagalit ni Garin.

Tinadyakan ng suspek ang biktima at nang bumagsak sa semento ay iniuntog ang ulo ni Camus.

Ngunit hindi pa nakontento, bumunot ng patalim ang suspek saka inundayan ng saksak ang biktima.

Rommel Sales