Asawa ng konsehal itinumba sa hotel (Recall election sa Palawan umiinit)

BINALOT ng tensiyon ang Puerto Princesa City matapos mapatay kahapon ng madaling araw ang isang kaalyado ni Palawan Governor Jose Alvarez sa isang hotel.

Binaril ng hindi pa nakikilang salarin si Albino Dingcohoy, 45 anyos, asawa ng isang kasapi ng Sangguniang Bayan sa Balabac, Palawan, sa labas ng kaniyang silid sa Princessa Inn sa pagitan ng 1:30 hanggang 2:30 ng madaling araw.

Sa inisyal na pagsisiyasat, lumitaw na posibleng gumamit ng gun silencer ang mga salarin dahil walang nakarinig ng putok.

Kaalyado ni Dingcohoy si Alvarez na sumusuporta kay Puerto Princesa City Mayor Lucilo Bayron na haharap sa recall elections laban kay Edward Hagedorn, ang dating alkalde, sa Biyernes, Mayo 8.

Kaugnay nito, hiningi ni Bayron sa Commission on Elections na pag-ibayuhin ang pagmamatyag sa recall election dahil sa pangambang pagsiklab ng karahasan sa siyudad.

Naniniwala si Bayron na hindi sapat ang pagkakatalaga kamakailan kay Police Superintendent Ernesto Tendero bilang hepe ng Philippine National Police sa Puerto Princesa. (DG)