P6-M shabu kompiskado sa drug ops vs mag-utol

ILOILO CITY – Nakakulong na sa Pavia Municipal Police Station sa lalawigan ng Iloilo ang magkapatid makaraan maaresto sa anti-drug operation ng Iloilo Police Provincial Office Anti-illegal Drugs Special Operations Group kamakalawa.

Ayon kay Senior Insp. John Ryan Doceo, umaabot sa 1.2 kilos shabu na nagkakahalaga ng P6 milyon ang kanilang nakompiska mula sa magkapatid na sina Dennis Paderog, 38, at Christopher, 23-anyos.

Ayon sa pulisya, ang naaresto na si Dennis Paderog ay kalalabas lamang ng New Bilibid Prison at kanilang na-monitor na nagbebenta ng ilegal na droga.

Nanlaban pa ang magkapatid sa mga pulis kaya’t napilitan ang mga awtoridad na barilin ang nakababatang si Christopher ngunit hindi tinamaan nang malubha.