15-anyos OSY hinalay ng kapitbahay

ISANG 15-anyos dalagita ang naging biktima ng panggagahasa ng kanilang kapitbahay sa Navotas City kamakalawa ng umaga.

Halos  hindi makalakad at namamaga ang mga mata dahil sa pag-iyak nang dumulog sa tanggapan ng pulisya ang biktimang itinago sa pangalang Jean, out of school youth (OSY), ng Brgy. Daanghari ng nasabing lungsod.

Agad naaresto ang suspek na si Christopher Bornasal, 29, ng Ignacio St., ng nasabing barangay, nahaharap sa kasong rape in relation to R.A. 7610 (Child Abuse), nakapiit sa detention cell ng Navotas Police.

Batay sa ulat ng Women’s and Children’s Protection Desk, dakong 6 a.m. nang pasukin ng suspek ang bahay ng biktima saka siya ginahasa.

Pagkaraan ay nagbanta ang suspek sa biktima na huwag magsusumbong kahit na kanino dahil may masamang mangyayari sa kanya.

Ngunit dumating ang kanyang ate na napansing tulala ang dalagita.

Nang tanungin, agad ipinagtapat ng biktima ang insidente kaya agad silang nagtungo sa himpilan ng pulisya saka ipinaaresto ang suspek.

Rommel Sales