Wish ni Erap pabor kay GMA sinopla ng palasyo

SINOPLA ng Palasyo ang birthday wish ni ousted president, convicted plunderer at Manila Mayor Joseph “Erap” Estrada na “house arrest” para kay dating pangulo at Pampanga Rep. Gloria Macapagal-Arroyo.

Ayon kay Communications Secretary Herminio Coloma Jr., mainam na ipaubaya sa hukuman ang pagpapasya hinggil sa hirit na house arrest para kay Arroyo na kasalukuyang naka-hospital arrest bunsod ng kasong plunder.

Giit ni Coloma, tungkulin ng prosecutors ng Department of Justice (DoJ) na tukuyin ang usaping ito, kapag may naghain ng petisyon sa hukuman.

Si Erap ay nagdiwang ng kanyang ika-78 kaarawan kahapon.

Matatandaan na si Arroyo ang nagbigay ng pardon kay Erap kaya nakalaya kahit nahatulan ng habambuhay na pagkabilanggo ng Sandiganbayan sa kasong plunder noong 2007.

Si Arroyo ay naka-hospital arrest mula noong Nobyembre 2011 at hiniling ni international human rights lawyer Amal Clooney sa United Nations Human Rights Commission na palayain siya dahil sa aniya’y paglabag sa karapatang pantao at may bahid politika ang patuloy na pagkakapiit sa dating pangulo.

Rose Novenario