18-anyos dalagita nakatakas sa manyak na kidnaper

NAKATAKAS ang isang 18-anyos dalagita sa isang manyakis na dumukot sa kanya sa Marikina City kamakalawa ng gabi.

Ayon kay PO3 Vanessa de Guzman ng Marikina PNP Women’s and Children’s Desk, itinago ang biktima sa pangalang Lorna, 18-anyos.

Kwento ng biktima, dakong 8 p.m. naglalakad siya sa Gil Fernando Avenue, Sto. Niño sa lungsod nang huminto sa tapat niya ang isang asul na Ford Everest na walang plaka at bumaba ang suspek habang hawak ang baril.

Tinutukan aniya siya ng baril sa leeg at kinaladkad papasok ng sasakyan.

Matagal aniya silang nagpaikot-ikot at sa takot ay hindi na niya matandaan ang lugar hanggang itigil ng suspek ang sasakyan sa tabi ng isang Burger King sa kanto ng Pambuli St., San Roque, Marikina City.

Muli aniya siyang tinutukan ng baril, pinaghahalikan at nilamas ang maselang bahagi ng kanyang katawan.

Gayonman, nang makakita ng tiyempo ang biktima ay tumalon habang nakahinto ang sasakyan at humingi ng saklolo sa security guard ng isang fastfood chain ngunit mabilis na pinasibad ng suspek ang sasakyan.

Nagsasagawa na ng follow-up operation ang awtoridad at inalarma na ang asul na SUV sa iba’t ibang lugar para matukoy at maaresto ang suspek.

Ed Moreno