Cedric, Zimmer, at Deniece, mas maraming ipis at dagang makikita sa bagong kulungan

ni Ed de Leon

NAPANOOD namin sa telebisyon habang sina Cedric Lee at Zimmer Raz, ang mga suspect sa kaso ng pambubugbog sa komedyanteng si Vhong Navarro ay inililipat sa Taguig City Jail mula sa kanilang kinakukulungan sa NBI Detention Center. Medyo pumalag si Raz sa kautusang iyon ng korte, dahil baka raw sa city jail ay “makatuwaan” sila ng ibang mga bilanggong fan ni Vhong. Hindi nga ba, hindi pa man sila nahuhuli ay may mga naka-post na sa Facebook na mga presong “inaabangan” na ang kanilang pagdating. Pero sinabi ng BJMP at maging ng korte na nasa ayos ang pagkukulungan sa kanila.

Hindi agad nailipat si Deniece Cornejo sa Taguig City Jail, dahil nag-file ng motion for reconsideration ang kanyang abogado, pero kung ganoon ang desisyon ng korte sa kaso ni Raz, palagay namin susunod na rin doon si Deniece. Kung sa CIDG ay sinasabi niyang mainit, at maraming ipis at daga, palagay namin mas marami siyang makikitang ganoon sa Taguig.

Ewan kung sa hinagap ng tatlong iyan ay naisip nilang masasadlak sila sa kalagayan nila ngayon.