HATAWAN
ni Ed de Leon
“ANG laki ng taxes sa industriya ng pelikula. Patong-patong simula pa sa raw stock. Kung iisipin mo, mas malaking tax ang sinisingil sa local film industry kaysa mga foreign film na dumarating ditong tapos na at ang tax na binabayaran ay sa exhibition na lang.
“Pero iyang taxation kasi, ginagawa iyan sa lower house, kaya nga iyan ang napag usapan namin ni Congw. Toff de Venecia at MTRCB chairman Rachelle Arenas na tumatakbo ring congresswoman na sila
na ang bahala riyan. At kung sakali naman na suwertihin tayo, magbibigay naman ako ng support at gagawa ng iba pang reforms para matulungan ang industriya sa senado,” sabi sa amin ni dating Mayor Herbert Bautista noong isang araw, nang masalubong sa isang
restaurant.
Inamin din ni Mayor Bistek na maraming loopholes ang ating mga batas na
kailangang tingnan.
“Kaya dumarami ang mga kaso na natatambak sa ating mga korte. Maraming mga batas noong araw na hindi na bagay ngayon, na kailangan nang palitan o amyendahan, at ngayon pa lang ang mga iyan ay pinag-aaralan na ng ating legal team, para kung sakaling palarin tayong mahalal sa senado, wala na tayong masasayang na oras. Maihaharap na natin agad ang mga gusto nating pagbabago,” sabi pa niya.
Mukha ngang kailangan natin si mayor Bistek sa senado.