HATAW! D'yaryo ng Bayan hatawtabloid.com
HATAWAN
ni Ed de Leon
TULUYAN na ngang isinampa ng piskalya sa Davao Occidental ang demandang cyber libel na iniharap ni Party List Representative Claudine Bautista ng Dumper (Drivers for Mass Progress and Equal Right). Ito ay may kaugnayan sa mga comment na inilabas ni Enchong Dee sa social media na tumutligsa sa sinasabing magastos na kasal ng kongresista sa Balesin.
Marami pang ibang sangkot diyan maliban kay Enchong, kabilang nga si Agot Isidro at ilan pang personalidad, pero sa opinion ng piskalya ang nasabi ng iba ay sarili lang nilang opinion at bahagi ng kanilang karapatan sa malayang pamamahayag, samantalang ang mga sinabi ni Enchong ay may bahid ng malisya kaya siya sinampahan ng kaso sa korte.
Ang matindi pa, ang gusto ng kongresista ay magbayad si Enchong ng P1-B dahil sa kanyang ginawang “paninirang puri.” Ang isipin ninyo ay ito, kung mapatutunayan sa hukuman na may kasalanan si Enchong, saan naman siya kukuha ng P1-B para ibayad? Kung sakaling sila ay magkasundong bawasan ang danyos, o kaya ay ibaba ng hukuman, halimbawang P500-M na lamang, o kalahati ng hinihinging danyos, saan pa rin kukunin ni Enchong ang ganoon kalaking halaga?
Si Enchong ay isang amateur athlete, commercial endorser, at artista, pero pagsama-samahin mo man ang lahat ng kinita niya simula noong una, hindi siguro aabot sa kalahating bilyon. Kung wala siyang ganoon kalaking halaga para ipambayad, ano ang mangyayari sa kanya?
Maaaring ang lahat ng pera niya sa banko, mga ari-arian, at negosyo, o kung mayroon man siyang bahay at mga sasakyan, mai-hold bilang bayad sa danyos, at may utang pa siya. Talagang mapipiga si Enchong basta natalo siya sa kasong iyan. Hindi naman siya makukulong dahil hindi naman kasong criminal na isinampa laban sa kanya, pero matindi iyan.
Maaaring tumagal ang kasong iyan ng ilang taon. Hindi mo rin masabi baka suwertihin naman si Enchong na manalo nang sunod-sunod sa mega lotto, may pambayad na siya. Pero kung iisipin mo pa rin ang gastos at ang atensyon habang hindi natatapos ang pagdinig sa kasong iyan ay hindi siguro na-imagine ni Enchong na sasapitin niya. Iyan ay dahil lamang sa natangay siya ng emosyon at nakapag-comment ng kung ano sa social meda.
Nag-sorry naman si Enchong pagkatapos, pero isa iyon sa nagdiin sa kanya. Dahil ang ginawa niya ay admission of guilt. Iyon mismo ay ebidensiya na na may ginawa siyang mali. Kawawang Enchong.
