HATAW! D'yaryo ng Bayan hatawtabloid.com
SUMIPA pa ang serye ni Angel Locsin bago natapos. Hindi lamang niya dinikitan, kundi kahit na sabihin mong isang araw lang, tinalo niya ang four year top rater na Ang Probinsyano.
Maipagmamalaki iyon kahit na sabihin mong minsan lang. Tinalo mo iyong apat na taon nang araw-araw na top rater.
Pero tama naman siya sa pagsasabing kaya naman nangyari iyon ay dahil napakalakas nga ng Ang Probinsyano, at walang dudang nagkakaroon ng spill over sa kasunod na programa ang audience share niyon. Iyan din siguro ang inaasahan nila, magkakaroon ng spill over sa kasunod na programa ng Ang Probinsyano ng kanyang audience share kaya matutulungan nang husto ang kasunod na serye kahit na anim na taong nawala sa telebisyon si Judy Ann Santos.
Pero maaasahan mo nga ba ang spill over lang?
Dapat nilang tanggapin na ang makakatapat niya ay isang serye na ang bida ay si Alden Richards, na kung tawagin ngayon ay Asia’s Multi Media Star, at may pelikulang sinasabing nakapag-akyat ng pinakamalaking box office record of all time. Ang naging problema nga lang, mukhang nasilat din si Alden nang hindi na si Kathryn Bernardo ang kasama, itinapat pa nga sa serye ni Angel. Hindi niya nakayanan.
Isa pang nakikita namin, lumalabas ngang parang mas bida pa iyong si Jo Berry kaysa kay Alden. Mas mapapel siya eh. Lumalabas sa ngayon na siya ang leading lady ni Alden sa serye.
Magaling namang artista iyong si Jo Berry, pero sana ilalagay naman nila sa tamang status. Hindi mo siya maaaring isabak sa primetime kahit na sabihin mong si Alden ang bida. Masyado naman nilang pahihirapan si Alden. Mabuti sana kung bumagsak iyan at makagawa ulit ng isa pang pelikulang kasama si Kathryn, eh paano kung hindi na?
HATAWAN
ni Ed de Leon
