HATAW! D'yaryo ng Bayan hatawtabloid.com
PAGKATAPOS ng press conference nila niyong Angela Markado ay nakausap pa namin ang isa sa mga actor na gumanap din bilang rapist ni Angela, si Polo Ravales. Inamin ni Polo na malaking bagay para sa kanya ang pelikulang iyan. Iyong huli raw niyang pelikula ay isa lamang indie na ginawa niya noong nakaraang taon pa. Iyong huli niyang mainstream movie ay ginawa niya matagal na panahon na. Ngayon lang siya ulit nakagawa ng isang mainstream movie.
Ang feeling nga raw ay parang noong nagsisimula pa lamang siya sa kanyang career, noong ang una niyang pelikula ay sabay-sabay na ipinalalabas sa maraming sinehan. Alam naman ninyo kasi ang mga indie, isa o dalawang sinehan lamang iyan.
Nangiti na lang din si Polo nang sabihin sa kanyang noong nagsisimula pa lamang siya sa kanyang career, maraming mga kritikong nagsasabi na sa kanilang batch ay siya ang pinakamagaling na actor, iyon nga lang may ibang mas nabigyan ng break kaysa kanya.
“Siguro hindi talaga para sa akin iyon. Siguro naman darating din iyong panahon na ako naman ang mabibigyan ng chance,” sabi ni Polo.
Siguro nga pagkatapos niyang Angela Markado na sinasabing napakahusay ng kanyang acting, darating na ang kanyang tamang panahon.
HATAWAN – Ed de Leon
