Senado kasado sa tanim-bala probe

HANDANG HANDA na ang imbestigasyon ng Senado sa kontrobersyal na isyu ng ‘tanim bala’ sa NAIA.

Itinakda ang pagdinig sa Huwebes, Nobyembre 12, dakong 10 a.m.

Bilang vice chairman ng Senate Committee on Public Service, pangungunahan ito ni Senador Sergio Osmena III. Ang chairman ng komite ay si Senador Ramon “Bong” Revilla Jr.,  kasalukuyang nakapiit dahil sa pork barrel scam.

Ayon kay Osmena, kasama sa kanilang ipatatawag bilang resource persons sina DoTC Secretary Joseph Emilio Abaya at MIAA General Manager Jose Angel Honrado, at ilang sinasabing nabiktima ng ‘tanim bala.’

Naniniwala si Osmena na may sindikato sa likod ng ‘tanim-bala’ sa NAIA at ito aniya ang gusto nilang mahubaran ng maskara.