72 death toll sa pabrikang nasunog  sa Valenzuela (30 sugatan)

UMABOT na sa 72 katao ang bilang ng kompirmadong namatay habang 30 ang nasugatan sa naganap na sunog sa pabrika ng tsinelas nitong Miyerkoles sa Valenzuela City.

Ayon sa ulat na inilabas ni Valenzuela City Mayor Rex Gatchalian, dakong 1:40 p.m. kahapon umabot na sa 72 ang nakuhang bangkay mula sa nasunog na Kentex Manufacturing Corpor., sa Tatalon St., Brgy. Ugong ng nasabing lungsod.

Napag-alaman, nahirapan ang mga tauhan ng Scene of the Crime Operation (SOCO) na makuha ang mga buto dahil nadaganan ng mabibigat na bagay at tanging ang nakalabas lamang ay ilang parte ng mga nasunog na bangkay.

Kabilang sa mga nasugatan sa sunog sina Terence Ong, at Carlito Ong na nakalabas na mula sa Chinese General Hospital makaraan malapatan ng lunas, habang naka-confine pa sa Valenzuela Emergency Hospital sina June Panado, Aljun Peron, gayondin si Aiza Atesado na ginagamot sa National Orthopedic Hospital sanhi ng pagkabali ng mga buto.

Isa sa mga namatay ay kinilalang si Tristan King, 25, anak ng isa sa mga may-ari ng nasunog na pabrika ng tsinelas, habang inaalam pa ang pagkakakilanlan ng iba pang mga namatay at nasugatan.

Matatandaan, dakong 11:23 p.m. nang masunog ang naturang pabrika nang tumalsik ang baga ng nagwe-welding na trabahador, sa kemikal na ginagamit sa paggawa ng tsinelas.

Ayon sa pulisya, nasa kostudiya na nila ang hindi pa pinangalanang welder.

Agad nakatakbo palabas ang mga empleyado na nasa unang palapag habang ang mga nagtatrabaho sa second floor ay nakulong at hindi na makalabas dahil sa biglang paglaki ng apoy, at hindi agad nakita ang susi ng kandado ng fire exit, ayon sa mga nakaligtas.

Rommel Sales