HATAW! D'yaryo ng Bayan hatawtabloid.com
ni Ed de Leon
Siguro nga ang inaasahan nila, nariyan pa iyong mga dating Sharon-Gabby fans na nakagawang malalaking hits ng mga pelikula nila noong araw, after all hindi pa naman siguro masyadong matatanda ang mga iyon.
Siguro iniisip nila na baka riyan makabawi naman si Sharon matapos siyang magkamali ng diskarteng lumipat ng ibang network, na kumita nga siya ng malaki pero lalo namang walang nakapanood ng shows niya dahil sa mahinang signal. Hindi natin maikakaila na bumaba ang popularidad si Sharon nang mapunta siya sa ibang network.
Si Gabby naman ay hindi na ganoon kalakas ang following simula nang magbalik matapos ang pagkawala sa showbusiness ng 13 taon. Maging ang pelikulang pinagsamahan nila ng kanyang anak na si KC Concepcion na inaasahan nilang aangat lalo na’t inendoso pa nga rin ni Sharon ay bumalibag pa rin. Kaya nga si Gabby ngayon supporting roles na lang ang ginagawa, pero siguro umaasa silang kung si Sharon ang leading lady baka sakaling maging bida pa siya.
Pero kung kami ang tatanungin, mukhang wala nang magic ang tambalan nila. Wala na kasing romantic angle na siyang nagdala sa kanilang team up noong araw. May iba nang pamilya si Sharon. Si Gabby naman ilang beses na nga bang nagpakasal ulit matapos na mahiwalay kay Sharon? Bukod sa megastar, tatlong iba pang babae ang naanakan niya. Ano pang romantic angle ang maiisip ninyo roon?
Kung sa bagay kanya-kanyang opinion iyan, pero kung kami ang tatanungin, parang mas naniniwala kaming magiging ok pa iyong nauna nilang balak na ang pagtambalin sa pelikula ay si Sharon at si Richard Gomez. Mukhang mas kikita pa iyon. Kasi tingnan naman ninyo ang track record ni Goma hanggang ngayon, malakas pa rin ang following. May nabitin pang project noon si Sharon na makakasama si Aga Muhlach, ok din siguro iyon. Pero iyong Sharon-Gabby, may papatos pa ba roon?
