Lim, Erap maghaharap sa Kamara (Sa isyu ng ‘photo bomber’ ni Rizal)

PAPASOK na rin sa eksena ang Kamara para imbestigahan ang kontrobersiyal na Torre De Manila.

Ayon kay House Committee on Metro Manila Development chairman, Rep. Winston Castelo, iimbitahan nila sina Manila Mayor Joseph Estrada at ang dating alkalde na si Alfredo Lim sa Hulyo 1 (Miyerkoles) upang pagpaliwanagin kung bakit pinabayaang itayo ang halos 50 palapag ng nasabing gusali.

Paglilinaw ni Castelo, layunin ng imbestigasyon na mabatid kung paano maso-solusyonan ang naturang isyu at hindi para magsisihan o magturuan kung sino ang may kasalanan sa pagtatayo ng naturang establisyemento.

Inaasahang magiging positibo ang resulta ng imbestigasyon ‘in aid of legislation’ upang kung sakali mabigyan ng karagdagang kapangyarihan ang National Commission for Culture and the Arts (NCCA) o ng police power sa mandatong iniatang sa kanila.

Habang sa pananaw ni Akbayan Rep. Ibarra Gutierrez, hindi malayong ma-ban nang permanente  sa lahat ng transaksyon ng government agencies ang DMCI kung mapatutunayang lumabag sila sa batas.

Ayon kay Gutierrez,  posibleng may nilabag ang DMCI dahil noong Enero pa naglabas ng Cease and Desist Order (CDO) para ipahinto ang konstruksyon ngunit idiniretso pa rin nila ang trabaho. 

Huminto lamang ang konstruksiyon nang magpalabas ng temporary restraining order (TRO) ang Korte Suprema nitong nakaraang linggo.

Jethro Sinocruz