City engineer, anak na bombero sugatan sa ambush

CAMP OLIVAS, Pampanga – Kapwa sugatan ang Tarlac City engineer at anak niyang bombero makaraan pagbabarilin ng dalawang hindi nakilalang lalaking lulan ng motorsiklo kamakalawa ng umaga sa Brgy. San Sebastian, Tarlac City.

Ayon sa ulat ni Senior Supt. Alex Sintin, Tarlac Police Provincial director, isinugod ng mga saksi sa Luzon Doctor’s Hospital ang mag-amang sina Bonifacio Liwanag, 52, Fire Officer 1 Cyrus Liwanag, 24, nakadestino sa Bureau of Fire and Protection sa lalawigang ito.

Ayon kay Senior Supt. Sintin, patungo sa kanilang trabaho ang mag-ama sakay ng Mitsubishi L-200 na minamaneho ni Bonifacio.

Pagpasok sa Gate-3 ng San Sebastian, bigla silang pinaulanan ng bala ng mga suspek na nakapuwesto sa kaliwang bakod.

Bagama’t  sugatan ay nagawa ni Bonifacio na patakbuhin ang sasakyan patungo sa himpilan ng BFP habang mabilis na tumakas ang mga suspek.

Leony Arevalo