HATAW! D'yaryo ng Bayan hatawtabloid.com
TATLO sa apat na Pinoy, gustong maibalik sa ere ang ABS-CBN sa pamamagitan ng bagong prankisa na hinarang ng 70 kongresista sa Mababang Kapulungan.
Base ito sa datos na lumabas sa survey ng Social Weather Stations (SWS) na pinaghahawakang pundasyon ngayon ng anim na miyembro ng Makabayan bloc sa Kamara na humihiling na payagang pagbotohan sa plenaryo ang desisyon.
Sa nasabing survey na isinagawa mula 3 Hulyo hanggang 6 Hulyo, nabatid na 13 porsiyento ng respondents ang nagsabing hindi na kailangang bigyan ng panibagong prankisa ang giant network at 10 percent naman ang nananatiling undecided.
Ayon kay Rep. Carlos Zarate ng Bayan Muna at isa sa miyembro ng grupo, hiniling niya sa chairman ng legislative franchises committee na isumite ang desisyon sa 305-member ng House plenary upang maratipikahan sa lalong madaling panahon.
Kung pagbabasehan natin ang survey, nangangahulugan na 75 porsiyento ng mga Filipino ang nagnanais na bigyan ng panibagong prankisa ang ABS-CBN.
Aniya, kung kuwestiyonable ang resulta ng survey para sa ilang miyembro ng komite, maaaring maresolba ito sa plenaryo upang mabatid kung papabor ba ang desisyon ng buong kapulungan sa tinig ng mamamayan.
Ito ang nilalaman ng liham na ipinadala ni Zarate kay Chairman Franz Alvarez na nilagdaan din nina Reps. Ferdinand Gaite, Eufemia Cullamat, kapwa ng Bayan Muna; France Castro ng ACT Teachers; Arlene Brosas ng Gabriela; at Sarah Elago ng Kabataan party-list.
Malinaw, anila na binalewala sa report ng technical working group ang mga testimonya ng mga ahensiya ng gobyernong tinawag sa pagdinig na nagpatunay na walang nilabag na anumang batas ang ABS-CBN.
Kabilang ang mga ahensiyang ito ang Department of Justice (DOJ), ang Bureau of Immigration (BI), Bureau of Internal Revenue (BIR), Securities and Exchange Commission (SEC), Department of Labor (DOLE), Kapisanan ng mga Brodkaster sa Pilipinas (KBP) at ang MTRCB.
Ayon sa anim na mambabatas, bagaman kuwestiyonable at kaduda-duda ang inilabas na report ng TWG, inaprobahan pa rin ito ng komite na naging dahilan upang maibasura ang franchise renewal ng ABS-CBN.
Sinabi ni Zarate, marami sa 305 kongresista ang pabor na pagdebatehan sa plenaryo ang naging desisyon ng komite sa pangunguna nina Reps. Vilma Santos-Recto, Edcel Lagman, at Lito Atienza.
Posible namang maisakatuparan ang kahilingang ito ng mga mambabatas, sapagkat mismong si House Speaker Alan Peter Cayetano na ang nagsabing, bagaman hindi pa nangyari na isumite sa plenaryo ang isang committee decision, maaari pa rin itong isagawa dahil may kapangyarihan ang plenaryo na ipatupad ito.
Mababatid na muling magbubukas ang sesyon ng kongreso sa Lunes, 27 Hulyo, kasabay ng State of the Nation Address (SONA) ni Pangulong Duterte. (NIÑO ACLAN)
