HATAW! D'yaryo ng Bayan hatawtabloid.com
INIUTOS ng Office of the Ombudsman ang dismissal kay suspended Makati Mayor Junjun Binay.
Ito ang ibinabang utos ni Ombudsman Conchita Carpio-Morales nitong Biyernes ng hapon.
May kinalaman ito sa kasong administratibong kinakaharap ni Binay kaugnay sa maanomalyang Makati City Hall parking building.
Paliwanag ng Ombudsman, malakas ang ebidensiyang nag-uugnay sa alkalde sa kontrobersiya sa kontrata ng parking building kaya dismissal ang desisyon sa kanyang “grave misconduct at serious dishonesty.”
Dahil dito, hindi na makatatanggap ng mga benepisyo si Binay bilang alkalde ng Makati City tulad ng retirement, sweldo at iba pang mga bonus.
Ayon sa Ombudsman, maaaring maghain ng motion for reconsideration (MR) ang kampo ni Binay sa Court of Appeals o Supreme Court (SC) ngunit epektibo na ang dismissal sa kanya.
Anang Ombudsman, sigurado nang natanggap ng kampo ni Binay ang kanilang desisyon kaya ‘effective immediately’ ang pagpapatalsik.
Sinuspinde si Binay sa ikalawang pagkakataon dahil sa overpriced na Makati Science High School.
Hindi pa masiguro kung makatatakbo pa siya sa 2016 at kung makapaghahain pa ng kanyang certificate of candidacy (COC) sa susunod na linggo.
‘DAANG MABILIS’ NI VP BINAY INUPAKAN NG PALASYO
MINALIIT ng Palasyo ang inilalakong “Daang Mabilis” ni Vice President Jejomar Binay bilang 2016 presidential bet.
Ayon kay Deputy Presidential Spokesperson Abigail Valte, subok na ang “Daang Matuwid” na pamamahala sa gobyerno na ipinamalas ni Pangulong Benigno Aquino III.
Napatunayan na aniya ng “Daang Matuwid” ang tapat at malinis na pamamahala at hindi ibinubulsa ang pera ng bayan.
“Doon sa daang mabillis. Alam mo ilang beses nang sinabi ito ni Pangulong Aquino na at least ‘yung daang matuwid subok na ‘di ba? Subok na matapat ‘yung pamamahala at subok na malinis ‘yung pamamahala at sigurado ho tayong sa tao napupunta ‘yung benepisyo hindi ho sa bulsa ng politiko,” paliwanag ni Valte.
Sa ginanap na Go Negosyo presidential series ay inihayag ni Binay na kapag siya ang pinalad na manalong pangulo sa 2016 elections ay isusulong niya ang Daang Mabilis upang maging epektibo ang paghahatid ng serbisyo sa taumbayan sa mabilis na pamamaraan.
(ROSE NOVENARIO)
