Roxas-Vilma niluluto?
hataw tabloid
July 22, 2015
News
SA KABILA ng mga meeting nina Pangulong Noynoy Aquino, Senadora Grace Poe at Sen. Chiz Escudero bilang bahagi ng konsultasyon ni PNoy para sa nalalapit na halalan ay biglang umusbong ang pangalan ni Batangas Governor Vilma Santos-Recto na makatambal ni DILG Secretary Mar Roxas, hindi sa pelikula ngunit para sa 2016 election.
Tumungong Batangas City Provincial Capitol si Roxas upang ibahagi ang bagong patrol jeeps sa mga munisipyo.
Ang proyektong mabigyan ng isang bagong patrol jeep ang lahat ng munisipyo sa bansa ay inisyatiba sa ilalim ng ‘Oplan Lambat Sibat’ ng DILG at Philippine National Police, na kinikilalang nagpababa sa mga krimen sa National Capital Region at mga kalapit na rehiyon.
Nang tanungin si Roxas sa posibilidad ng tambalan nila ni Gov. Vi, sinabi niya na: “Well, bakit naman hindi? It’s not for me to say. Pero tingnan na lang natin ang rekord.”
Binalikan ni Roxas ang magandang track records ni Gov. Vi bilang mayor ng Lipa at three-term governor ng Batangas.
“A whole myriad of budgetary deficit to security, to agriculture, lahat iyan ay naharap niya. So, kung titingnan, may kakayahan, may karanasan, may kaalaman kung ano ang gagawain. So, nasa sa kanya at nasa mga kababayan niya kung ano ang mangyayari,” dagdag niya.
“Mahalaga rito ay ipagpatuloy natin ang napagtagumapayan na natin sa Daang Matuwid.”
Umamin naman si Gov. Vi na merong “feelers” mula sa administrasyon para sa 2016.
‘“Thank you for considering me,” sabi ni Gov. Vi sa mga reporter na nakausap niya sa pasinaya ng mga bagong E-Passport system sa Malvar, Batangas kahapon.
Ngunit tumanggi ang actress-politician na magsalita lalo’t wala pang pormal na alok na inihahahin sa kanya si PNoy.