5 preso pumuga sa Koronadal police station (Bantay nakatulog)

KORONADAL CITY – Pinaghahanap ng pulisya ang limang itinuturing na notorious na mga bilanggo makaraan makatakas sa lock-up cell ng Koronadal City PNP pasado 1 a.m. kahapon.

Kinilala ang nakatakas na mga bilanggo na sina Karamudin Kansang Salipada, Muhamedin Kansang Salipada, Osmeña Midtawan Mamasalanao, Manalos Mamasalanao Sandigan, at Nelson Labungan, pawang sangkot sa ilegal na droga.

Ayon sa impormasyon, dumaan ang naturang mga bilanggo sa nilagareng rehas ng selda at hindi napansin ng bantay na si PO1 Teofilo Toledo, pinaniniwalaang nakatulog.

Ayon kay Senior Supt. Jose Arnaldo Briones Jr., provincial director ng South Cotabato PNP, nagpapatuloy ang imbestigasyon sa nangyaring jailbreak.

Habang sinabi ni Supt. Nestor Salcedo, chief of police ng Koronadal City PNP, nakatakda sanang i-commit sa South Cotabato Provincial Jail ang nakatakas na mga bilanggo.