HATAW! D'yaryo ng Bayan hatawtabloid.com
DIPOLOG CITY – Patay ang isang ginang makaraan saksakin ng sariling anak dahil sa posporo sa Brgy. Bayabas Bethlehem, Polanco, Zamboanga del Norte kamakalawa.
Kinilala ang biktimang si Letecia Aviles, 51, habang ang suspek ay si Marvin Aviles, 27-anyos, kapwa residente sa naturang lugar.
Sa inisyal na imbestigasyon ng mga awtoridad, bago nangyari ang krimen, masayang nagbibiruan ang suspek, kanyang kapatid at tiyuhin sa loob ng kanilang bahay.
Ilang minuto ang lumipas ay dumating ang biktima at nagtanong kung nasaan ang posporo na naging dahilan ng kanilang mainit na pagtatalo.
Sinundan ng suspek ang ina sa kusina at pagkaraan ay narinig ang sigaw ng biktima.
Makaraan ito, bumulagta sa kanila ang duguang biktima na may tatlong tama ng saksak sa katawan.
Sinasabing isang hunting knife ang ginamit ng suspek sa pagpaslang sa sariling ina.
Agad naaresto ang suspek makaraan ang insidente.
