Pacman mainit na sinalubong ng fans  

HINDI magkamayaw sa pagkaway at paghiyaw ang mga nakaabang na fans ni boxing icon Manny Pacquiao habang nag-mo-motorcade kahapon. 

Dakong 10 a.m. kahapon nang mag-umpisang umusad ang convoy ni Pacman na nagsimula sa isang hotel sa Makati.

Ang ruta ng motorcade ni Pacman ay dumaan sa mga sumusunod na lugar: Pasay road sa Makati, patungong Makati Avenue, lumiko sa may Sen. Gil Puyat Avenue at tinumbok ang Roxas Boulevard patungong Rajah Sulayman park at dumiretso sa Manila Hotel.

Daan-daang fans ang naka-antabay sa kalye para masilayan Filipino ring icon na namigay ng mga tshirt, CD at posters.

Nagsisilabasan ang mga empleyado ng ilang establishments kung saan dumaan ang convoy ni Pacman.

Habang umuusad ang convoy kasabay rito ang pagtutog ng kanta ni Pacman.

Pasado 11 a.m. nang marating ng convoy ni Pacman ang Rajah Sulayman park sa Maynila kung saan isang programa ang inihanda.

Ang nasabing programa ay bahagi ng heroes welcome nila kay Pacquiao na isang adopted son ng Maynila.

Sa maikling mensahe ni Pacman kanyang pinasalamatan ang mainit na pagsalubong sa kanya ng mga Filipino.