PH, Norwegian envoy, 4 pa patay sa chopper crash sa Pakistan
hataw tabloid
May 9, 2015
News
ISLAMABAD, Pakistan – Kabilang ang ambassador ng Filipinas at Norway sa anim kataong namatay nitong Biyernes nang bumagsak ang sinasakyan nilang helicopter sa isang paaralan sa northern Pakistan, ayon sa tweet ng army.
Sina Leif H. Larsen, Norwegian envoy, at Domingo D. Lucenario Jr. ng Filipinas, ay kabilang sa mga namatay kasama ng mga misis ng Malaysian at Indonesian ambassadors, gayondin ang dalawang piloto ng helicopter.
Sa naunang ulat ng AFP, apat katao ang namatay, kabilang ang dalawang piloto at dalawa sa tatlong foreigners, nang bumagsak ang helicopter sa isang paaralan sa northern Pakistan, ayon sa opisyal, nagbabalang maaaring tumaas pa ang bilang ng casualties.
Ayon sa mga opisyal, ang sitwasyon ay “urgent” makaraan ang helicopter – kabilang sa tatlong sinasakyan ng delegasyon ng foreign diplomats at kanilang aides, ay bumagsak sa paaralan habang naroroon sa loob ang mga mag-aaral.
“Update Naltar: info so far; two pilots and two-3 foreigners fatalities. Thirteen survivors with varying degree of injuries,” tweet ni Asim Bajwa, spokesman ng Pakistan army.
Ang convoy ng tatlong helicopters ay may lulang delegasyon ng foreign diplomats at kanilang aides patungo sa Pakistan Gilgit-Baltistan territory, bahagi ng ‘disputed’ Kashmir region.
“It was a diplomatic trip with members of 37 countries in total,” ayon sa isang pasahero ng isa sa mga helicopter, na hindi nagpakilala, idinagdag na nasunog ang paaralan makaraan ang crash.
“We have been told to send in as many ambulances as we can because the situation there is urgent,” ayon sa senior official.
Ang mga sugatan ay inilipad sa military hospital sa Gilgit, ang administrative capital ng rehiyon, 50 kilometro patungo sa southwest, dagdag ng isa pang senior local police official.
Sa lungsod ng Gilgit, sinabi ng hospital official, ang mga sugatan ay dinala sa emergency ward ng Combined Military Hospital. (rappler.com)