5-anyos kritikal 3 sugatan sa truck vs van

KORONADAL CITY – Nasa kritikal na kondisyon ang 5-anyos batang lalaki makaraan magbanggaan ang isang truck na pagmamay-ari ng povincial government ng South Cotabato, at van sa national highway na sakop ng Purok Pag-asa, Brgy. Reyes Banga, South Cotabato, dakong 9:30 a.m. kahapon.

Kinilala ang batang nasa kritikal na kondisyon na si Gino Mondejar.

Sugatan ang kanyang ama na si Erwin Mondejar, driver ng Hyundai Starex van, habang ang dalawa pang mga sugatan ay kinilalang sina Hernanie Maquilan, 43, truck driver, at Nestor Santander, 37, kapwa mga empleyado ng Provincial General Services Office.

Ayon kay PO1 Raymund Alaer ng Banga PNP, papuntang lungsod ng Koronadal ang van habang maghahatid ng corn harvester ng Provincial Agriculture’s Office ang truck sa demo farm sa bayan ng Banga.

Nag-overtake ang van sa isang sasakyan at posibleng nag-lock ang manibela nito na nagresulta sa ‘head on collision.’

Nasa ICU ng Doctors Clinic and Hospital ang bata habang ginagamot ang tatlong iba pang su-gatan.