HATAW! D'yaryo ng Bayan hatawtabloid.com
INANUNSIYO na ni Barangay Ginebra coach Tim Cone na simula sa Governors Cup na mag-uumpisa mamaya ay mahabang playing time na ang ibibigay niya sa rookie na si Earl Scottie Thompson.
Kumbaga ay paghahanda na ito para sa takeover ni Thompson sa lead point guard na papel ng Gin Kings sa mga susunod na seasons.
Ibig sabihin ay ireretiro na ng Barangay Ginbebra ang dating Most Valuable Player na si Jayjay Heltrbrand pagkatapos ng season na ito. Kasi ay halos hindi na kasama sa rotation ni Cone si Helterbrand. Paminsan-minsan na lang itong nagagamit.
Ibig sabihin ay magiging pamalit ni Thompson si LA Tenorio sa mga susunod na taon, Ito ay sa kabila ng pangyayaring kamakailan lang ay naging kandidato si Tenorio sa Gilas Pilipinas subalit hindi napasama sa final line-up ni coach Tab Baldwin.
E marami ang nagsasabing dapat ay nakabilang si Tenorio sa final line-up at baka kung nagkaganoon ay naiba ang tadhana ng Philippine team na nakalasap ng dalawang kabiguan sa elimination round at yumuko kaagad.
Pero iba ang Gilas at iba ang Barangay Ginebra. Magkaiba sina Baldwin at Cone.
So, hindi puwedeng sabihing babawiin ni Cone ang kanyang naianunsiyo na.
Kung mapapatunayan ni Thompson na karapat-dapat nga siyang bigyan ng mahabang playing time, malamang na bago matapos nang season ay siya na talaga ang floor leader ng Gin Kings at hindi na si Tenorio.
Tatanggapin naman ni Tenorio ang pangyayaring ito. Alam naman niya na may hangganan ang lahat at hindi na rin siya bumabata. Siyempre, iisipin ni Tenorio kung ano ang makakabuti sa Barangay Ginebra.
Pero kapag hindi nasiyahan si Cone sa ipinakita ni Thompson, siyempre nandiyan pa naman si Tenorio na kanyang maaasahan.
Kaya naman na kay Thompson na kung kaya niyang pantayan ang tiwala ng kanyang coach!
SPORTS SHOCKED – Sabrina Pascua
