Cong Alfred nag-file na ng COC sa pagka-konsehal

FACT SHEET
ni Reggee Bonoan

NAG-FILE na ng kanyang Certificate of Candidacy si 5th district Representative of Quezon City Alfred Vargas kahapon ng umaga (Martes) kasama ang kanyang maybahay na si Yasmine Espiritu na ipinost niya sa kanyang Facebook page na may 441k followers.

Ang caption ni Cong. Alfred sa larawan nilang mag-asawa at nasa likod ang kapatid niyang si Konsehal PM Vargas, ”Nagpapasalamat po tayo sa panibago na namang opportunity to serve! Thank you, Amore, dahil palagi kang nasa tabi ko sa bawat laban.

“Thank you, Mayor Joy Belmonte sa pagiging halimbawa ng sipag at malasakit para sa QCitizens. Thank you, Vice Mayor Gian Sotto at Cong. Kit Belmonte.

“Gayundin ang pasasalamat natin sa ating mga ka-District V na patuloy na nagtitiwala at nagmamahal sa amin ni Coun. PM Vargas. To God be the glory.”

Samantala, may nakasilip naman sa COC ni Cong Alfred na kumakandidato pala siya bilang Konsehal sa 5th district ng Quezon City. Sa madaling salita, nagpalit sila ng puwesto ng kapatid niyang si PM na kumakandidato bilang kongresman sa parehong distrito.

Huling termino na pala kasi ni Cong. Alfred kaya konsehal ang target niya sa May 2022.