HATAW! D'yaryo ng Bayan hatawtabloid.com
SA isinagawang hot-pursuit operation ng kapulisan ay matagumpay na naaresto ang tatlong kalalakihan, kabilang ang dalawang menor de-edad, kaugnay sa pagpatay sa isang 18-anyos na lalaking estudyante sa Brgy. Caingin, Lungsod ng Malolos, Bulacan kamakalawa ng gabi.
Ang agarang pagkakaaresto sa mga suspek ay naisakatuparan sa pamamagitan ng mabilis at epektibong aksyon ng Malolos PNP sa ilalim ng pamumuno ni PLt.Colonel Rommel E Geneblazo, chief of police, katuwang ang Bulacan PPO SWAT Team.
Batay sa isinagawang imbestigasyon, napag-alaman na ang mga suspek at ang biktima ay kapwa sangkot sa naganap na suntukan malapit sa Caingin Elementary School dakong alas-10:00 ng gabi.
Sa kasagsagan ng insidente, isang menor de-edad na suspek na kinilala sa alyas “John” ang sinasabing bumunot ng patalim at sinaksak ang biktima sa kaliwang bahagi ng tiyan, na naging sanhi ng agarang pagkamatay nito.
Sa kasalukuyan, ang isang suspek ay nasa kustodiya na ng Malolos CPS para sa kaukulang pagsasampa ng kaso, habang ang dalawang (2) menor de-edad ay itinurn-over sa City Social Welfare and Development Office (CSWDO) ng Malolos para sa tamang disposisyon alinsunod sa umiiral na batas. (MICKA BAUTISTA)
