Friday , March 29 2024

Agawan sa Palasyo
‘HOUSE OF DUTERTE’ GUMUHO NA

111521 Hataw Frontpage

ni ROSE NOVENARIO

MISTULANG kastilyong buhangin na gumuho ang pamilya Duterte na nalantad dahil sa mga hakbang at pangyayari kaugnay ng eleksiyon sa Mayo 2022.

Malalaman sa mga susunod na araw kung “blood is thicker than water” kapag tinotoo ni Pangulong Rodrigo Duterte ang banta na anomang oras ay may ‘pasabog’ siya kaugnay sa disgusto niya sa pagtakbo ng kanyang anak na si Davao City Mayor Sara Duterte bilang bise presidente ng anak ng diktador at dating senador Ferdinand “Bongbong” Marcos, Jr.

“In a matter of hours, you would know. I will make an announcement. Baka ‘to, ano lang, para malaman ng tao na hindi ko nagustuhan ‘yung nangyari,” anang Pangulo sa panayam sa Banat By vlogger.

Ang panayam ay naganap makaraang kumalat ang video ng TV5 sa Commission on Elections (Comelec) na si Communications Secretary Martin Andanar ang sumasagot sa ambush interview sa Pangulo nang tanungin kung kakalabanin niya ang anak sa pagka-bise-presidente.

“I don’t know. Nag-file ba? Nag-file ba anak ko?” tanong ng Pangulo.

Pero si Andanar ang sumagot at sinabi sa media na babalik ngayong araw, Lunes, sa Comelec si Pangulong Duterte para mag-file ng kanyang VP candidacy.

Hindi na binigyan ng pagkakataon na sumagot pa muli si Pangulong Duterte at pinaalis na ng ‘hawi boys’ ang media.

Sinamahan ni Pangulong Duterte sa Comelec ang longtime aide na si Sen. Christopher “Bong” Go para bawiin ang VP bid at maghain ng COC bilang presidential candidate.

Sa Banat By vlogger, inamin ni Pangulong Duterte na hindi sila nagkakausap ni Sara bago naghain ng certificate of candidacy (COC) bilang vice president ang anak.

“Totoo na hindi ko talaga alam. Nalaman ko no’ng nag-file siya. Noong nag-file siya alam ko na. Noong nag-file siya (Sara), umatras si Bong,” aniya.

Kinuwestiyon ni Pangulong Duterte ang pagtakbo ni Sara bilang VP ni Bongbong gayong nanguna ang anak sa presidential survey.

“I am sure ‘yung pagtakbo ni Sara ay desisyon nila Bongbong ‘yun. Siya ang number 1 sa survey, bakit siya pumayag na tatakbo lang na bise,” anang Pangulo.

Itinanggi niya na may nagdidikta sa kanya para gawin ang pagsuporta kay Go.

Ikinuwento niya na umiyak sa kanya si Go na nagpaalam na iaatras ang VP bid dahil tumakbong vice presidential bet si Sara kaya inudyukan niya raw ang longtime aide na kumandidato na lamang sa pagka-presidente.


DUTERTE
“CANNOT
BE REACHED”
NI SARA

Ayon sa source na mala­pit sa pamilya Duterte, kawawa si Sara dahil walang access sa kanyang ama dahil binabakuran umano ni Go.

Ginagawa umano ni Go ito upang protektahan ang mga “kanegosyo at allies” sa gobyerno.

Kasunod nito, tinang­gal na umano ni Sara ang lahat ng tauhan ni Go na nasa campaign team niya.

Habang ang malapit na kaibigan ni Sara na si Atty. Bruce Rivera ay may mga ipinukol na tanong sa isyu na ang pagsuporta sa Bongbong-Sara ay paghahati sa pamilyang Duterte.

“Sino ba ang nakigulo sa away ng pamilya? Sino ba ang enabler na samahan ang isa pang tumakbong bise kahit tapos na ang pagiging president? Sino ba ang nagpasama mag-file kahit hindi nga masama­han ang sariling anak mag-file ng COC nito? Sino ang mas ginustong magkainisan ang kapamilya kahit puwede naman huwag makialam kasi nasa posisyon naman siya at may kapang­yarihan? Sino ba ang ginagamit ang popularity ng ama para siraan ang anak?” ani Rivera sa paskil sa Facebook.

Para kay Bagong Alyansang Makabayan (Bayan) secretary-general Renator Reyes, Jr., sa paglutang ng Bongbong-Sara at Go-Duterte sa 2022 elections ay parang pinapipili ang mga botante kung aling bersi­yon ng impiyerno ang mas gusto nila.

About Rose Novenario

Check Also

Seguridad sa mga simbahan para sa bisita iglesa tiniyak ni MPD chief

Seguridad sa mga simbahan para sa bisita iglesa tiniyak ni MPD chief!

PERSONAL na naglibot sa ibat-ibang Simbahan si MPD Director PBGen Arnold Thomas Ibay at ininspeksyon …

PICPA Foundation spearheads Green Project

PICPA Foundation spearheads Green Project

VISITORS will soon be seeing a greener Philippine Institute of Certified Public Accountants (PICPA) national …

SM Cares 1 Manila - Parade Shot

SM shows solidarity for Down syndrome community through this year’s Happy Walk

SM Cares, a long time-supporter of the Down Syndrome community, is celebrating 20 years of …

Notoryus na wanted holdaper sa NCR, todas sa enkwentro sa Batangas!

Notoryus na wanted holdaper sa NCR, todas sa enkwentro sa Batangas!

NASAWI ang isang lalaki na tinaguriang kilabot na holdaper at akyat bahay na kabilang sa …

Bernard Kaibigan Palawan

Pamilyang Pinoy protektado sa Palawan ProtekTODO

BATAY sa datos ng Philippine Insurance Commission, nananatiling mababa sa 1.75 porsiyento ang bilang ng …