Rodjun deadma sa mga basher

MATABIL
ni John Fontanilla

NO pansin kay Rodjun Cruz ang mga basher at nagmemenod sa kanya sa pagiging online seller.

Si Rodjun ang Vice President for Marketing at PR ng bago nilang negosyo ng asawang si Dianne Medina, na tumatayong CEO & President ng DM Studios para sa sarili nilang Live Commerce at Creator Agency, kasama ang pinsang beauty queen na si Maxine Medina na Vice Presidente for Sales naman.

Ayon kay Rodjun hindi niya pinapansin ang mga basher at wala siyang dapat ikahiya sa pagiging online seller dahil hindi ito madaling trabaho.

“Proud live seller po ako kasi hard work po ‘yan, eh, marangal na trabaho.

“And hindi totoo na ‘pag nagla-live ka, wala ka nang trabaho, laos ka na, hindi po.

“May mga project pa po tayo. Kaka-champion lang po natin sa ‘Stars on the Floor.’

“May serye po tayong ginagawa and proud po ako rito kasi po ‘yung team namin, lahat po ‘yan, nagwo-work for their families,” paliwanag ng aktor.

Itinayo nina Rodjun, Dianne, at Maxine ang DM Studios para makatulong at magbigay raket sa mga kapwa nila artista at influencers sa pamamagitan ng online selling.