Bela, ‘di ginamit ang pagiging Padilla (para sumikat)

TOTOONG kamag-anak n mga Padilla si Bela Padilla—pero wala siyang dugong Padilla.

Ang nanay nina Robin Padilla ang kamag-anak ng pamilya ni Bela. “Carino” ang maiden name ng nanay nina Robin na si Eva. Sa pagkakaalam namin, kapatid ng lola ni Bela ang ina ni Robin. Isang foreigner ang ama ni Bela.

So ‘yun nga: totoong kamag-anak nina Robin si Bela—pero walang dugong Padilla ang mahusay at matalinong aktres.

Parang ang nanay ni Robin ang hiningian ng pahintulot ng pamilya ni Bela na gamitin nitong showbiz family name ang “Padilla”. At mukhang proud naman ang mga Padilla kay Bela, lalo pa ngayong nakilala na siya ‘di lang bilang aktres kundi bilang scriptwriter na rin. May balak pa nga yata siyang maging direktor din. O, ‘di ba multi-talented siya?

In fairness to Bela, never naman siyang nag-claim na dugong Padilla siya. Ang sinasabi lang naman n’ya ay kamag-anak siya ng mga Padilla.

Wala na sigurong maiintriga kay Bela para sa promo ng pelikula nila ni Carlo Aquino na Meet Me in St. Gallen, kaya may mga nagpapasaring na fake Padilla siya.

For some reasons, kahit na parang may love scenes sila ni Carlo sa pelikula, walang nakakaisip na i-link sila romantically sa isa’t isa. Mas inili-link pa si Carlo ngayon sa ex n’yang si Angelica Panganiban kaysa kay Bela. Pinapasigaan ang supposed pagpapa-sweet nina Bela at Zanjoe Marudo pero idini-deny nga nila na may romantic attachment sila sa isa’t isa.

Pero maski i-deny nila, sana magharutan pa rin sila sa Instagram at mag-date paminsan-minsan. Puwede naman nilang gayahin sina Xian Lim at Kim Chiu na walang relasyon, pero biglang nagbakasyon sa ibang bansa na sila lang ang magkasama.

So, ‘yun nga, iniintriga na lang ang pagiging walang-dugong Padilla ni Bela.

KITANG-KITA KO
ni Danny Vibas