Lady rider patay sa trailer truck
AGAD binawian ng buhay ang isang 58-anyos babaeng rider matapos magulungan ng trailer truck ang minamanehong motorsiklo sa Quezon City, nitong Lunes ng gabi, 2 Marso.
Sa imbestigasyon ng Quezon City Police District (QCPD) Traffic Sector 1, pauwi ang biktima sa lungsod ng Valenzuela mula sa kaniyang trabaho nang maganap ang insidente dakong 8:00 ng gabi kamakalawa sa EDSA-Cloverleaf, Barangay Unang Sigaw, sa naturang lungsod.
Napag-alamang patungo ang trailer truck sa Malabon City upang gumarahe nang maramdaman ng driver na may kumalso sa kanilang gulong.
Nang bumaba ang driver, nakita niya na nasa ilalim na ng truck ang motorsiklo kasama ang biktimang hindi na gumagalaw.
Boluntaryong sumuko sa pulisya ang driver at nakipag-areglo sa pamilya ng biktima na hindi na isusulong ang kaso laban sa kaniya.
