PAL nasunog sa ere

NAPILITANG bumalik sa Ninoy Aquino International Airport (NAIA) ang Philippine Airlines flight na patundong London, ilang saglit makaraan mag-take off nitong Biyernes dahil sa ‘electronically detected’ na apoy at usok.

Sinabi ni Engineer Octavio Lina, Manila International Airport Authority assistant general manager, ang PAL flight PR 720 patungong Heathrow Airport ay lumipad dakong 1:59 pm lulan ang 170 pasahero kabilang ang flight crews, nang ma-detect ng cockpit flight indicator ang apoy at usok sa isa sa landing gears.

Bunsod nito, napilitan ang piloto na si Capt. Miguel Ben Gomez, na ibalik at ilapag ang eroplano, isang Airbus 340-300,  makaraan ang 18 minuto sa himpapawid.

Inabisuhan ang eroplano ng air traffic controllers na mag-dock sa bay 49 ng NAIA Terminal 2, ayon kay Lina.

Bukod dito, sinabi ni Lina, bilang pag-iingat, agad nag-deploy ng MIAA fire and rescue personnel sa runway makaraan iabiso ng piloto sa mga awtoridad ang kondisyon ng eroplano.

Pagkaraan, ang PAL Flight 720  ay kinansela na nagdulot ng perhuwisyo sa mga pasahero.

Ayon sa mga reporter na nagko-cover sa premier airport ng bansa, tikom ang bibig ng PAL management kaugnay sa seryosong insidente, habang hindi mahagilap ang spokesperson nito na si Cielo Villaluna para magbigay ng komento.

HATAW News Team