Mag-ama pumalag sa buy-bust, utas

PATAY ang mag-ama makaraan makipagpalitan ng putok sa mga pulis sa isinagawang buy-bust operation sa Tondo, Maynila kamakalawa ng gabi.

Agad binawian ng buhay si Arcy Remorado, 43, miyembro ng Commando gang, residente ng 3192 Int. 5, Pilar Street, Tondo, Maynila habang binawian ng buhay sa Ospital ng Tondo ang anak niyang si Eduardo Remorado, ng nasabi ring lugar.

Ayon sa ulat ni PO3 Marlon San Pedro na isinumite kay Senior  Insp. Rommel Anicete, hepe ng Manila Police District Homicide Section, dakong 11:20 p.m. nang maganap ang isnidente sa loob ng bahay ng mga biktima.

Nagpangap na poseur buyer ang isa nilang operatiba at bumili ng shabu na nagkahalaga ng P1,000 kay Arcey.

Nang makatunog ang mag-ama na may kasamang mga pulis ang poseur buyer ay agad silang bumunot ng baril at pinaputukan ng mga awtoridad.

Gumanti ng putok ang mga pulis na nagresulta sa pagkamatay ng mag-ama.

Narekober mula sa pinangyarihan ng insidente ang isang paltik na baril at ilang plastic sachet ng shabu.

( LEONARD BASILIO, may kasamang ulat nina Kimbee Yabut at Joana Cruz )