100% PNP revamp ipatutupad — Gen. Bato

TINIYAK ni incoming PNP chief Ronald Dela Rosa, 100 porsiyento nang buong puwersa ng pulisya ang maaapektohan sa nakatakdang balasahan ngayong araw, Hulyo 1, 2016.

Sinabi ni Dela Rosa, mula sa Kampo Crame hanggang sa lahat ng probinsiya at siyudad sa buong bansa ang apektado ng balasahan.

Kinompirma rin ni Dela Rosa, binigyan siya ng kalayaan ni Pangulong Rodrigo Duterte para magsagawa ng malawakang balasahan.

Ito aniya ay para walang maging hadlang sa kanilang ikakasang operasyon kontra droga.

Tumanggi munang sabihin ni Dela Rosa kung sino-sino ang mga itatalaga niya sa mga posisyon dahil baka magreklamo raw agad ang mga lokal na politiko at mag-umpisang tumawag sa kanya.

Sa ngayon, nakahanda na aniya ang mga papeles ng reassignment at pirma na lang niya ang hinihintay ng mga dokumento.