6 patay, 9 sugatan sa pagbangga ng jeep sa truck

COTABATO CITY – Patay ang anim katao habang siyam ang malubhang nasugatan makaraan bumangga ang sinasakyan nilang pampasaherong jeep sa isang nakaparadang dump truck sa Maguindanao kamakalawa.

Batay sa impormasyon mula sa pulisya, ang mga biktimang lulan ng pampasaherong jeepney (MWB-489) ay mula sa Tacurong City at patungo sa lungsod ng Cotabato.

Pagsapit sa Brgy. Baka at hangganan ng Brgy. Pinquiaman, Datu Odin Sinsuat, Maguindanao, bumangga ang sasakyan sa nakaparadang dump truck sa gilid ng national highway.

Apat agad ang binawian ng buhay nang bumaliktad ang jeep habang dead on arrival sa pagamutan ang dalawa pang biktima.

Ang siyam nasugatan ay patuloy na nilalapatan ng lunas sa Cotabato Regional and Medical Center (CRMC) sa lungsod ng Cotabato.

Sinasabing dahil sa ulan at madulas na kalsada ang posibleng dahilan ng insidente.

Patuloy pang iniimbestigahan ng pulisya ang pagkakakilanlan ng mga namatay at nasugatan.