Jacky Woo, bigay-todo ang acting sa pelikulang Tomodachi

INSPIRADO ang Japanese actor-producer na si Jacky Woo sa bago niyang pelikula na pinamagatang Tomodachi ng Global Japan Incorporated. Ito’y mula sa direksiyon ni Joel Lamangan at pinagbibidahan din nina Eddie Garcia, Bela Padilla, Pancho Magno, at Hiro Peralta.

Ang pelikulang Tomodachi (na ang kahulugan ay kaibigan) ay hinggil sa pagmamahalan nina Toshiro (Jacky) at Rosalinda (Bela). Isang pag-iibigan sa pagitan ng isang sundalong Hapon at Filipina na naganap sa sa ilalim ng digmaan.

Sa baluktot na pagta-Tagalog, sinabi ni Jacky ang saloobin sa naturang pelikula. “Ako masaya. Direk Joel is like Kurosawa, sobrang professional, magaling siyang direktor.

“Siyempre I like this country, maybe kalahati puso (ko) Filipino. May bahay na, maybe dito mag-stay. I like itong Pilipinas at itong showbiz. Gusto ko lagi mag-work dito sa showbiz.”

Sa pamamagitan ng kanyang interpreter, ipinahayag din ni Jacky na, “Nagpapasalamat ako na nakatrabaho ko ulit si Direk Joel. Kasi, siya ang pinakamagaling na direktor sa Pilipinas. Kaya iyong mga emotion ko ay nailalabas ko dito ng maayos kapag kasama ko si Direk Joel. Nagpapasalamat din ako sa mga kasama kong actor at aktres dito.”

Ipinahayag pa ni Jacky na panagarap niyang kilalanin bilang dramatic aktor, kaya inspirado at bigay-todo raw siya sa pagganap dito sa Tomodachi.

 

ALAM MO NA! – Nonie V. Nicasio