SV positibong kakampi ang Manilenyo

RATED R
ni Rommel Gonzales

TUMATAKBONG independent candidate si Sam “SV” Verzosa bilang alkalde ng Maynila.

Pero hindi bothered si SV kahit masasabing solo flight siya sa kanyang laban.

“Sobra-sobra ‘yung mga naninira, grabe!

“Eh wala na nga akong partido, independent na nga ako pero todo pa rin ‘yung paninira nila. 

“Sobrang threatened na kasi sila kasi kakampi ko na ‘yung buong Manilenyo,” ang sigaw ni SV na sinabayan ng nakabibinging hiyawan ng napakaraming taong dumalo sa caucus niya Linggo ng gabi sa Ermita.   

“Ito ‘yung mga tunay na kakampi ko. Sila po ang aking partido,” pagtukoy pa rin ni SV sa mga Manilenyong kasama niya sa gabing iyon.

“Wala man akong partido, independent man ako, ang kakampi ko ‘yung mga Manilenyo. Sila ‘yung lumalaban para sa akin, sila ‘yung mga umaasa at sila rin ‘yung mga ipinaglalaban ko.

“Basta ang importante sa akin ‘yung adbokasiya ko, prioridad ko ‘yung kalusugan ng mga senior citizen, pag-aaral ng mga bata at kabuhayan ng mga walang trabaho, iyon ang importante.”

Wala man siyang kapartido, kapag nanalo siyang mayor, ay magiging team player si SV maging sino man ang mahalal na bise-alkalde.

“Kasi ‘pag nandoon na po ako, ako na ang susuyo sa kanila, ako na ‘yung lalapit, ako na ‘yung mag-aabot ng aking kamay.

“Para magkaroon ng pagkakaisa. At saka sa eleksiyon lang naman ‘yung galit-galit, eh.

“Pagkatapos ng eleksiyon kailangan nating magkaisa kasi maraming umaasa,” sinabi pa ni Sam o SV.